કોઈ સાચી ને શ્રદ્ધાની કંઠી પ્હેરે
કોઈ ખોટી ને દેખાડાની કંઠી પ્હેરે
મોંઘામાની કંઠી પ્હેરે માણસ મોટા
નાના માણસ તો સપનાની કંઠી પ્હેરે
કોઈ પ્હેરે કિસ્મતનું માદળિયું-તાવીજ
કોઈ ખાલી પરસેવાની કંઠી પ્હેરે
રાજીપાની કંઠી પ્હેરે કોઈ કાયમ
કોઈ કાયમ ખાલીપાની કંઠી પ્હેરે
પોતે કંઠી પ્હેરી રાખે વાંધો ક્યાં છે?
એ તો કંઠી પ્હેરાવાની કંઠી પ્હેરે
મન ફાવે એવી કંઠી સૌ પ્હેરે લોકો
કંઠી પોતે પસ્તાવાની કંઠી પ્હેરે
કંઠી ઉર્ફે કુંડાળું ને વાડાબંધી
માણસ એમાં બંધાવાની કંઠી પ્હેરે
ભરત ભટ્ટ ‘પવન’
