હ્રદયને હચમચાવી નાંખનારી કંઇક ઘટનાઓ,
બને, એવી રીતે ઊડ્યાં કરે છે રોજ અફવાઓ.
તમે જે કંઇ જુઓ છો એ ફક્ત જોતાં જ રહેવાનું,
કશું કરવાને માટે બહાર પડતાં હોય ફતવાઓ.
મકાનો, માણસો, વૃક્ષો, પશુ પંખીઓ સઘળું છે,
અને લાગ્યાં કરે તે ચીતરેલા માત્ર પરદાઓ.
અહીં ધરતીથી ધરતી ખૂબ છેટી કેમ લાગે છે ?
અડે છે એક-બીજાને અહીં સાતે ય દરિયાઓ.
અહીંથી આ નગર ને તે નગર ઘૂમીને થાક્યો છું,
કે જાણે જોઈ લીધી હોય મેં બે-ચાર દુનિયાઓ !
હવે તો રાત આખી ઊંઘ આવે છે મરણ જેવી,
અહીંથી દૂર ભાગે છે હવે સઘળાંય સપનાઓ.
ભરત વિંઝુડા
